هل تعرفون لماذا انجلط معظم الشعب اللبناني؟؟؟ كتب د. طلال حمود

من روائع الادب السياسي -الإقتصادي في لبنان ومن موقعي كمتخصّص بـ أمراض القلب والشرايين والجلطات وكمُهتم بالشأن السياسي والإقتصادي والمعيشي والإجتماعي العام
أنقل إليكم هذه القصّة التي تُحاكي بدقّة عالية ما وصلت اليه للأسف اوضاعنا في لبنان بسبب سياسات مالية، إقتصادية و نقدية تعرفون جميعاً من المسؤول عنها من *عصابات السُلطة وتغطية ومشاركة رياض سلامة ومافيات اصحاب المصارف* وكارتيلات المحروقات والمشتقات النفطية واصحاب الموتيرات وناهبوا اموال الجمارك في المطار والمرفأ وعصابات النافعة ومافيات التهريب الغير شرعي ونصّابي شركتي الخلوي وسماسرة ومتعهّدي معظم المشاريع العامّة في لبنان من كهرباء ومياه وسدود وطرقات ومدارس وآبار ارتوازية وغيرهم ومن مراكز النهب المُوزع طائفياً ومذهبياً في مجلس الإنماء والإعمار ومجلس الجنوب وصندوق المهجّرين وغيره من صناديق التنفيعات والمشاريع الوهمية احياناً لخدمة هذا الزعيم او ذاك…وغيرهم واللائحة طويلة جداً وكلكم تعرفونها . وقد كانوا جميعهم تقريباً شركاء مع ثُلّة معروفة جداً من المحازبين والمحظيين
والمحظوظين من اصحاب النفوذ والسلطة ( الذين لا يتجاوز عددهم ال ٤٠٠ شخص ركبوا وتسلّطوا على رقاب ٥ مليون لبناني وسرقوا اموالهم واموال المغتربين الذين هاجروا الى غابات افريقيا و-او صقيع كندا او ادغال الامازون لكي يُحصّلوا لقمة العيش التي سرقها ابناء الزعماء ومحاسيبهم دون اي عناء او مشقّة) .

وهُنا أتمنى ان لا يسألني احد كيف انجلط الشعب اللبناني الذي ركبوه (واستحمروه) منذ اكثر من ثلاثين سنة. اعتذر على صريح عباراتي وشفافيتي لأنني اصبحت في موقف من قد يُصاب بجلطة بسبب عدم قدرتي على تحمّل مُمارساتهم وكذبهم ونفاقهم وعهرهم ولمجموعة كبيرة منهم ممّن اصبحوا حديثي او قديمي النعمة والذي وصل بعضهم الى السلطة مُؤخّراً بعناوين كاذبة ومُزيّفة اغرت الكثير من اللبنانيين وجعلت من هؤلاء السياسيين الجُدد الذين استبشرنا بهم امل الإصلاح الحقيقي ولكننا اكتشفنا انهم مثل كل الطبقات العفنة الأخرى من الحُكّام الذين ركبونا منذ فترة طويلة جداً بل اتعس منهم بأشواط.

*واليكم قصة المواطن اللبناني الذي يُحاكي حماره بكل صراحة وواقعية*
*واستميحُكم لكونها باللغة العاميه لأن صاحب هذا الحمار لم يكن محظيّاً لكي يدخل المدرسه فلم يكن مقرباً من أصحاب السلطة و النفوذ ولم يكن قادراً على دفع مبلغ محتوم من المال لكي يدخل المدرسة الحربية او ينال احد مناصب القضاء او اية مديرية عامة* ،
ولذلك فإن القصّة باللغه العامّية وهي بذلك اقرب لواقعنا اللبناني الذي نعيشه كل يوم :

مواطن لبناني مربّي حمار.. فاق لقى الحمار ميت! أخدو لعند الدكتور البيطري تا يعرف شو سبب الوفاة.. قالّ الدكتور لصاحبو : العوض بسلامتك الحمار مات بجلطة..

تطلع هالمواطن بالحمار.. و مسكلو راسه.. وصار يحكيه بتعجّب وحرقه وإستغراب:

ليه إجتك الجلطة..؟!!!
موظّف وصلت للموت وما اعطوك السلسلة..؟!
قصّرت معك بالشعير..؟!
خريج هندسه او محامي او دكتور وما ملاقي شغل..؟!
خريج تجاره او ادب انجليزى وواقف بسوق الخضرة..؟!
خريج إدارة اعمال وبتسوق تاكسى او كميون شحن..؟!
خريج حقوق وبتشتغل سمسار..؟!
عندك أولاد متفوّقين ما قادر تعلمهن بالجامعه..؟!
عندك أولاد خرج ضباط وأمن ما معك تدفع برطيل ت يفوتوا عالحربية..؟!
مرض حدا عندك وما استقبلوه بالمستشفى قبل ما تدفع تامين على الباب قبل ما يسعفوك ويعالجوك وبعدان يحكوا بالمال والعملة الخضرة اللي شاغلة بالهم دون اي إعتبارات إنسانية..؟!
خريج زراعه واجاك تعيين تشتغل زبّال بالبلديه..؟!
جمعت كل اللى بتملكه وعطيته لإبنك تا يسافر عا أوروبا وغرق ع شواطئ قبرص او تركيا او اليونان..؟!
مديون و ما قادر تسدّد ديونك ل اصحابك او للبنك وحجزوا على كل ممتلكاتك ومنعوا عليك السفر..؟!

خبّرني بس ليه إجتك الجلطه..؟!!!
شعبكن مغرور وحسود وما بيحب الخير لحدا..؟!
ساكن عند أهلك وما قادر
تستاجر بيت أو تعمّر لأنهم محتكرين تجارة الترابة والحديد والخشب والبحص والرمل والكسّارات وكلّوا على غلا اسعار متل النار..؟!
في حمار سرقك أو نصب عليك او عمل فيك ضرب..؟!
حدا من أهلك مخطوف ومطلوب عليه فدية 100 مليون وما معك منهم فرنك وعم يهديدوك بقتلو كل ساعة ..؟!
ما معك مصاري وعم تشكي القلّة والفقر والمذّلة ع ايدين الطبقة الساسية النتنة، العفنة ب لبنان..؟!

حبيبتك بدًا تتجوز وما قادر تخطبها وتفتحلها بيت وانت اصلاً عاطل عن العمل لأنوّا اصلاً ما في عمل لحدا..؟!

رحت ترخّص سيارة “الكيا” ولقيت عليها مخالفات رغم إنك جايبها وكالة..؟!
ما قادر تشتري تياب واكل لأولادك او تدفع اقساط المدارس والجامعات..؟!
ما ملاقى بيت للإيجار او معاشك بطّل يكفّي كم يوم بسّ..؟!

قلّي.. ليه إجتك الجلطة..؟!
آخذ قرض و متورّط بالسداد لأنك انطردت من شغلك من اوّل يوم ازمة..؟!
اجتك فاتورة كهربا وما قدرت تدفعها وفصلو عنك الكهرباء او الإشتراك..؟!
الدنيا ملخبطه حواليك ومخك بطّل يجمع من كثر فساد القضاء والبطء في المحاكمات والتعسّف والإستنسابية والكيدية في تطبيق بعض القوانين الجائرة..؟!

غلا اﻻسعار ما عاجبك وحاسس إنو السياسين عم يمصّو دمّك وقتلو حلمك وطموحك متل ال ٥ ملايين مواطن متلك..؟!

خبّرني ليش إجتك الجلطة..؟!
طلعت عالتقاعد ومعاشك ما مكفيك بس إيجار بيتك ومع انهيار الليرة صار ما يكفيفك اوّل اسبوع من الشهر ..؟!
إجاك فشل كلوى من الميّ الملوّثة ورحت تغسل كلى، قالولك ما في محلات وتخت فاضي ولازم تنطر لحدا يموت ومنفوّتك مكانه..؟!
ما ملاقي شغل من الأيدي العاملة الاجنبيه او لأنّ اكثر الشركات والمؤسسات سكّرت وطردت عمّالها..؟!
مُرض ابنك ما بيدخل مستشفى بموت لأنك ما معك مصاري للتامين..؟!
مرضت بالسرطان وبأمّنولك دواء خالصه مدته من ثلاث سنين وببيعوا الأدوية الصالحة بالسوق السودا او بتتهرّب من “الكرنتينا” للمحاسبب الواصلين او اصحاب النفوذ ..؟!
عندك زعما ونواب ووزراء بينزلوا معك بيتظاهروا ضد الفساد اللي هنّي اوّل اربابو..؟!
عندك سياسيين بيتناكفوا على وزير او منصب او حُصّة وازنة او ثلث معطّل وبيخربوا البلد وبشلّوا كل شي ومتل إجرهن مصالح الناس ومشاكل وازمات البلد ومستقبل البلاد والعباد..؟!

عايش مع ناس بنفس الوطن وحاسس انّو بعضهم بيتآمرو عليك او كل همّهم يحطّموك ونسيوا انكم شركا في الوطن وشعب واحد شو ما صار ورح يصير ..؟!

ممكن أعرف ليه إجتك الجلطه..؟!
الدولار هتك عرض الليرة تبعك..؟!
ورياض سلامة وعصابات المصارف شرشحوك وذلّوك على ابواب المصارف…
وبتروح ل تسحب ميّة دولار من “وديعتك حقّك” وجنى عمرك وتعبك وبتنتطر نهار كامل وبتتبهدل وبترجع ايدك فاضية لأنو خلصوا الدولارت وانت ناطر بالدور وبالشمس وراح نهارك إنتظار رحمة سليم صفير وعصاباتوا ..
بدّك تحوّل مبلغ ل ابنك اللي عم يدرس في الخارج وصار بنصّ او آخر الطريق ..حرام.. وما عم يقبل مدير الفرع يحوّلك..
عم تشوف مارسيل غانم وغيرو من الإعلاميين المأجورين كيف عم يتشتشو رياض ورح تنفلج من كثر كذبهم ودجلهم ونفاقهم …ورح تقوم تكسّر الشاشة من كتر تمسيح الجوخ!؟
عم تسمع اخبار “رياض” كيف عم يعربد ويتنمرد ويتعجرف وانت كاشفو انوّ اكبر حرامي من ٣٥ سنة؟!
عم تسمع “صفير” كيف بعدوا معنطز ومسترجل ويا ارض اشتدّي وما حدا ادّي وعم يقول للناس. قررات دولتكم ومجلسكم النيابي مسّحوا فيها …؟!
خبّرني عم تشوف المسرحيات الدايرة في المجلس النيابي وما قادر تتحمّل لوفكة ولفّ ودوران ليهربوا من التحقيق الجنائي اللي لازم يصير بالتوازي حتى ما يصير ولا رح يصير اصلاً لأنّو كلن ما بدهن يصير !؟
عم تسمع هيدا الزعيم كيف عم يطالب بحصّة مذهبوا او طائفتوا او عشيرتو وكيف مشلول البلد بالمطالب والحصص والكراسي الشخصية وما حدا همّوا حصة الوطن!؟
عم تسمح بأخبار القضاء وكيف كل واحد فاتح على حسابو وهيدا مع وهيداك ضد وهيدا بيستدعي واحد والتاني غيروا بس نكايات بنكايات؟! وشفت كيف “صوّان ” بعت ورا “دياب و خليل و زعيتر و فنيانوس” وأكيد عرفت انّو “عون” استدعت “رياض” وما راح وانت انسطلت كيف ما راح وبعدك مضروب ع راسك ومش فاهم شو عم يصير بهالعصفورية القضائية؟!

سمعت بتصريحات “انور الخليل” وردّ “جريصاتي” عن إنتهاكات الدستور وانجلطت لأنُّن كُلن دعسوا الدستور من زمان ودافنينوا سوى وكل واحد بيديرها على الثاني؟!
واكيد سمعت بإجتماعات ” السنيورة وسلام و الميقاتي” ومطالبهم وحرصهم على تطبيق الدستور لأنهم طول عمرهم كانوا هيك يطبّقوه نقطة نقطة ومادة مادة؟!
سمعت احدهم عم يقول “الرطل بدّو رطل ونص” والتاني “جاوبوا اركب اعلى خيلك” والثالث عم يجوبوا “فشرت ع رقبتك” وانت مش عم تفهم معاني هذه العبارات ولا عارف شو دين اهل السياسة بها البلد؟!
رح موت وما أعرف ليه إجتك الجلطة..
بدك تقلي إنك بتحسّ أكتر منا..؟!!!
ما في ولا سبب للجلطات ب لبنان انتا شكلك عم تزيدها…
ما “رياض” بعدو مُصرّ انّو *ليرتنا بألف خير ووضعنا بألف خير*….
مش حاسس انك عم تزيدها….
روح الله يسامحك
روح الله يسامحك
شكلك عم تزيدها..
لبنان بألف خير والأيام الجاية بعد “*رفع الدعم رح ناكل كلّنا شعير*”..
لك روح الله يسامحك….

د. طلال حمود- طبيب قلب وشرايين- اختصاصي جلطات دماغية -مُنسّق ملتقى حوار وعطاء بلا حدود